 | Официальная правовая информация |
УКАЗ ПРЭЗІДЭНТА РЭСПУБЛІКІ БЕЛАРУСЬ
15 ліпеня 2025 г. № 277
Аб афіцыйных геральдычных сімвалах Міністэрства інфармацыі
У мэтах захавання і развіцця гістарычных традыцый Міністэрства інфармацыі пастанаўляю:
1. Заснаваць:
эмблему Міністэрства інфармацыі;
флаг Міністэрства інфармацыі.
2. Зацвердзіць:
Палажэнне аб эмблеме Міністэрства інфармацыі, яе апісанне і выяву (прыкладаюцца);
Палажэнне аб флагу Міністэрства інфармацыі, яго апісанне і выяву (прыкладаюцца).
3. Фінансаванне расходаў на выраб заснаваных дадзеным Указам афіцыйных геральдычных сімвалаў Міністэрства інфармацыі ажыццяўляць у межах сродкаў, прадугледжаных у рэспубліканскім бюджэце на ўтрыманне Міністэрства інфармацыі.
4. Дадзены Указ уступае ў сілу пасля яго афіцыйнага апублікавання.
|
Прэзідэнт Рэспублікі Беларусь |
А.Лукашэнка |
|
|
Указ Прэзідэнта |
ПАЛАЖЭННЕ
аб эмблеме Міністэрства інфармацыі
1. Эмблема Міністэрства інфармацыі (далей – эмблема) з’яўляецца атрыбутам і адметным знакам Міністэрства інфармацыі.
2. Выява эмблемы размяшчаецца на флагу Міністэрства інфармацыі, афіцыйным сайце ў глабальнай камп’ютарнай сетцы Інтэрнэт, ганаровых граматах Міністэрства інфармацыі і падзяках Міністра інфармацыі.
3. Выява эмблемы можа размяшчацца ў службовых кабінетах Міністра інфармацыі, яго намеснікаў, залах пасяджэнняў і ў іншых месцах, вызначаных Міністрам інфармацыі.
4. Выява эмблемы можа выкарыстоўвацца на друкаванай, рэкламнай, інфармацыйнай, сувенірнай прадукцыі, а таксама ў іншых выпадках, якія не супярэчаць заканадаўству. Эмблема можа служыць асновай для стварэння нагрудных знакаў прыналежнасці і адметнасці Міністэрства інфармацыі.
5. Дапускаецца ўзнаўленне выявы эмблемы ў каляровым, чорна-белым (контурным) і аб’ёмным варыянтах.
|
|
Указ Прэзідэнта |
АПІСАННЕ
эмблемы Міністэрства інфармацыі
Эмблема Міністэрства інфармацыі ўяўляе сабой авал серабрыстага колеру з прамянямі, якія разыходзяцца ад цэнтра. У цэнтры размешчана абрэвіятура «МІ» (МІНІСТЭРСТВА ІНФАРМАЦЫІ): літара «М» зялёнага колеру, якую перакрывае літара «І» белага колеру з чырвоным беларускім арнаментам. Кропка над літарай «І» чырвонага колеру, акантаваная тонкім бела-зялёным контурам.
Эмблема Міністэрства інфармацыі апраўлена аблямоўкай зялёнага колеру, яе вянчае выява Дзяржаўнага герба Рэспублікі Беларусь. На аблямоўцы белымі літарамі напісана «МІНІСТЭРСТВА ІНФАРМАЦЫІ РЭСПУБЛІКІ БЕЛАРУСЬ». У верхняй частцы злева ад Дзяржаўнага герба Рэспублікі Беларусь размешчана слова «МІНІСТЭРСТВА», справа – «ІНФАРМАЦЫІ», у ніжняй частцы – словы «РЭСПУБЛІКІ БЕЛАРУСЬ».
|
|
Указ Прэзідэнта |
ВЫЯВА
эмблемы Міністэрства інфармацыі
|
|
Указ Прэзідэнта |
ПАЛАЖЭННЕ
аб флагу Міністэрства інфармацыі
1. Флаг Міністэрства інфармацыі (далей – флаг) з’яўляецца яго афіцыйным геральдычным сімвалам.
2. Флаг можа размяшчацца на будынках Міністэрства інфармацыі, арганізацый, якія ўваходзяць у яго сістэму, у службовых кабінетах Міністра інфармацыі, яго намеснікаў, кіраўнікоў арганізацый, якія ўваходзяць у сістэму Міністэрства інфармацыі, залах пасяджэнняў і ў іншых месцах, вызначаных Міністрам інфармацыі.
3. Выява флага можа выкарыстоўвацца на друкаванай, рэкламнай, інфармацыйнай, сувенірнай прадукцыі, а таксама ў іншых выпадках, якія не супярэчаць заканадаўству.
4. Флаг можа выкарыстоўвацца падчас дзяржаўных свят і святочных дзён, а таксама афіцыйных, прэзентацыйных, урачыстых, выставачных, культурна-масавых і спартыўных мерапрыемстваў, у тым ліку па-за адміністрацыйным будынкам (памяшканнем) Міністэрства інфармацыі.
|
|
Указ Прэзідэнта |
АПІСАННЕ
флага Міністэрства інфармацыі
Флаг Міністэрства інфармацыі ўяўляе сабой прамавугольнае палотнішча белага колеру з суадносінамі шырыні і даўжыні 1:2.
У цэнтры вонкавага і адваротнага бакоў палотнішча размешчана выява эмблемы Міністэрства інфармацыі.
Дапускаецца выраб флага Міністэрства інфармацыі большага ці меншага памеру з захаваннем суадносін шырыні і даўжыні 1:2 і адпаведных прапорцый.
|
|
Указ Прэзідэнта |
ВЫЯВА
флага Міністэрства інфармацыі
