 | Официальная правовая информация |
ПАСТАНОВА МІНІСТЭРСТВА КУЛЬТУРЫ РЭСПУБЛІКІ БЕЛАРУСЬ
23 снежня 2013 г. № 94
Аб зацвярджэнні праекта зон аховы гісторыка-культурнай каштоўнасці – «Брацкія могілкі, 1941–1944 гады, вул. Савецкая ў г.п. Ушачы Віцебскай вобласці»
На падставе часткі першай пункта 2 артыкула 29 Закона Рэспублікі Беларусь ад 9 студзеня 2006 года «Аб ахове гісторыка-культурнай спадчыны Рэспублікі Беларусь» Міністэрства культуры Рэспублікі Беларусь ПАСТАНАЎЛЯЕ:
Зацвердзіць прыкладзены праект зон аховы гісторыка-культурнай каштоўнасці – «Брацкія могілкі, 1941–1944 гады, вул. Савецкая ў г.п. Ушачы Віцебскай вобласці».
|
Міністр |
Б.У.Святлоў |
|
|
Пастанова 23.12.2013 № 94 |
Праект зон аховы гісторыка-культурнай каштоўнасці – «Брацкія могілкі, 1941–1944 гады, вул. Савецкая ў г.п. Ушачы Віцебскай вобласці»
ГЛАВА 1
АГУЛЬНЫЯ ПАЛАЖЭННІ
1. Праект зон аховы гісторыка-культурнай каштоўнасці – «Брацкія могілкі, 1941–1944 гады, вул. Савецкая ў г.п. Ушачы Віцебскай вобласці» (далей – праект зон аховы) распрацаваны на падставе часткі першай пункта 2 артыкула 29 Закона Рэспублікі Беларусь ад 9 студзеня 2006 года «Аб ахове гісторыка-культурнай спадчыны Рэспублікі Беларусь» (Национальный реестр правовых актов Республики Беларусь, 2006 г., № 9, 2/1195).
2. Брацкія могілкі (1941–1944 гады) па вул. Савецкай у г.п. Ушачы Віцебскай вобласці з’яўляюцца гісторыка-культурнай каштоўнасцю катэгорыі «3», якая ўнесена ў Дзяржаўны спіс гісторыка-культурных каштоўнасцей Рэспублікі Беларусь пад шыфрам 213Д000779 у адпаведнасці з пастановай Савета Міністраў Рэспублікі Беларусь ад 14 мая 2007 г. № 578 «Аб статусе гісторыка-культурных каштоўнасцей» (Национальный реестр правовых актов Республики Беларусь, 2007 г., № 119, 5/25167).
3. Праект зон аховы распрацаваны навукова-праектным рэспубліканскім унітарным прадпрыемствам «БелНДІПгорадабудаўніцтва» па заказе Ушачскага раённага выканаўчага камітэта.
4. Праект зон аховы распрацаваны з мэтай забеспячэння аховы гісторыка-культурнай каштоўнасці і яе гістарычнага асяроддзя, заключаецца ў вызначэнні межаў зон аховы і ўсталяванні рэжымаў іх утрымання і выкарыстання.
5. Праект зон аховы распрацаваны на падставе гісторыка-архіўных, бібліяграфічных і натурных даследаванняў, аналізу існуючай горадабудаўнічай сітуацыі і ландшафту.
6. Праектам зон аховы ўстаноўлены наступныя зоны аховы гісторыка-культурнай каштоўнасці: ахоўная зона, зона аховы ландшафту.
Схема зон аховы дадаецца.
ГЛАВА 2
АХОЎНАЯ ЗОНА
7. Ахоўная зона ўстаноўлена зыходзячы з патрабаванняў фізічнага і эстэтычнага захавання гісторыка-культурнай каштоўнасці, а таксама стварэння ўмоў для яе спрыяльнага зрокавага ўспрымання. Ахоўная зона ўключае тэрыторыю, якая непасрэдна прымыкае да гісторыка-культурнай каштоўнасці.
Плошча ахоўнай зоны складае 0,06 га.
8. Межамі ахоўнай зоны з’яўляюцца:
на поўдні, захадзе і поўначы – лінія, якая ідзе па знешнім краі дарожкі, што праходзіць па перыметры брацкіх могілак;
на ўсходзе – лінія, якая ідзе па бартавым камені праезнай часткі вул. Савецкай.
9. На тэрыторыі ахоўнай зоны забараняецца будаўніцтва будынкаў і збудаванняў.
10. На тэрыторыі ахоўнай зоны дазваляецца:
правядзенне рамонтна-аднаўленчых работ на састаўных элементах гісторыка-культурнай каштоўнасці;
санітарная высечка зялёных насаджэнняў;
правядзенне работ па добраўпарадкаванні тэрыторыі.
ГЛАВА 3
ЗОНА АХОВЫ ЛАНДШАФТУ
11. Зона аховы ландшафту ўстаноўлена на тэрыторыі скверу зыходзячы з неабходнасці захавання прыроднага асяроддзя, якое мае візуальную сувязь з гісторыка-культурнай каштоўнасцю, забеспячэння гарманічнага адзінства паміж прылеглай забудовай і гісторыка-культурнай каштоўнасцю.
Плошча зоны аховы ландшафту складае 0,8 га.
12. Межамі зоны аховы ландшафту з’яўляюцца:
на поўначы – лінія, якая ідзе ад паўднёва-ўсходняга вугла дома № 32 па вул. Савецкай да кропкі перасячэння восі вул. Савецкай і ўмоўнай лініі, якая ідзе ў створы з паўднёвым фасадам дома № 21 па вул. Савецкай;
на ўсходзе – лінія, якая ідзе па восі вул. Савецкай;
на поўдні – лінія, якая ідзе па агароджах прыватных участкаў уздоўж вул. Школьнай, ад усходняй мяжы зоны аховы ландшафту да паўночна-ўсходняга вугла дома № 21 па вул. Школьнай;
на захадзе – умоўная лінія, якая ідзе ад паўночна-ўсходняга вугла дома № 21 па вул. Школьнай да паўднёва-ўсходняга вугла дома № 32 па вул. Савецкай.
13. На тэрыторыі зоны аховы ландшафту забараняецца:
новае капітальнае будаўніцтва;
змяненне характару ландшафту.
14. На тэрыторыі зоны аховы ландшафту дазваляецца:
добраўпарадкаванне і азеляненне, якое не скажае існуючы характар тэрыторыі;
пракладка неабходных інжынерных камунікацый;
санітарная высечка зялёных насаджэнняў.
|
|
да праекта зон аховы |
